2021年4月4号礼拜天，是西方格复活节，欧元之父——88岁格蒙代尔勒自家屋里走了。

搿格朋友有一个金融三角勿成立理论：资本流动、货币独立、汇率稳定，是想做也做勿全格事体。就像男女也有做勿到格三角理论：男人铜钿多、卖相好、又勿花哧哧，极少；女人嗲溜溜、特独立、面孔又标致，难得！大男人小女人侪做勿到！

格么蒙代尔为啥要弄出来欧元呢？一开始欧洲十二个国家拉了一只朋友圈，圈子里厢国家自娱自乐，互惠互利，快捷方便，最重要是搭米格利少搭界了，欧元格符号是希腊字母∈，表示文明发源地勒了欧洲，也表示了英文欧洲Europe格第一个字母，当中两根横线表示欧元非常稳定。十二颗星代表朋友圈里有十二个国家，2002年元旦正式开始流通，勒了自家朋友圈里白相欧元了，二十年前格走势一路看好！

一个勿懂《易经》格朋友老萨摒勿牢了，宣布：伊拉克出口石油用欧元结算了，为啥？现在1.38美元：1欧元，高收益了。搿只动作一出来，老米发急疯了，一块400亿美元格蛋糕讲呒么就呒么啦，哪能办？老米真格做得出，米老头发令：做脱伊！就拿了一包肥皂粉，一本正经对全世界讲，发现伊拉克有大规模杀伤性武器，一时头里全世界媒体跟勒嗨起哄、简直炒翻了天，真格是下作透顶！结果么大家侪晓得了：米老头是凭空捏造出来格事体，人家根本呒么大规模格杀伤性武器，后果就是直接造成一百多万伊拉克士兵阵亡了，国家打得来千疮百孔，几百万人流离失所，侪成了难民，而老萨哪能呢，全世界电视直播公审，最后上了绞刑架。老米则勒了伊拉克划出一块绿区领地，唉，绿区！而占99.99%土地格伊拉克人连屁也呒么得到：人权、自由、民主呢？萨达姆走了，而发动战争者却得到“诺贝尔和平奖”。啥格路道？

另外还有一个朋友——老卡，伊还要结棍了！既勿用美元也勿用欧元，直接用黄金结算出口石油，难么利比亚讨厌了，欧美联手，拿伊做脱！欧洲人先动手打，米国人发动了一场十八分钟格闪电战，一个统治了自家国家四十二年格强者，被扶值起来格反对派力量打了一场代理人战争，老卡走得非常惨，受尽了折磨，手段极其下流，私刑下被一枪爆毙…

米国总统第一日上班就要宣誓…，拿手压牢两本书，一本宪法、一本圣经……，但是一个国家可以随随便便对另一个主权国家发动了战争，犯下滥杀无辜格滔天大罪！用勿着理由就可以随意灭脱人家格国家，居然还能够获得诺贝尔和平奖！啥格情况啊？所有格事体侪由伊拉讲了算，伊拉制定规则，伊拉发号施令！格么联合国跑到啥地方去啦？勿是还有国际法庭吗？WTO呢？上帝啊、真主啊、菩萨啊，倷是勿是可以跑出来讲句把公道闲话呢？哦！原来搿三个朋友侪是有人拿伊造出来格！

中东石油格资源极其丰富，完全可以睏了嗨赚铜钿，假使呒么了动乱，天下太平，日脚勿要太好过啊，老百姓真能幸福安康，现在呢？伊拉克一战，老米自家也陷进去了，到今朝究竟弄清爽了伐？利比亚打到今朝还勒了打啊，萨拉杰、哈夫塔尔，土国为了自家格利益，用747输送…，埃及、阿拉伯联合酋长国……，一直延伸到叙利亚，土国格东南角，欧洲格难民之源，欧盟之间勿用签证，爱琴海里土国搭西腊十八只岛之争，难民们就勒了缝隙里钻来钻去，直到今朝……

纵观天下才能知晓兴衰盛败，碰到百年之大变局，天时勿及地利、地利勿及人和、天时地利人和、三者勿得、虽胜有殃，熟史明鉴，就能顺天应道！

来龙去脉看《欧元》